Í kvöld koma Stjörnumenn í heimsókn í leik sem skiptir okkur Haukamenn gríðarlega miklu máli í baráttunni um sætaskipan í úrslitakeppninni. Það er ekki spurning um hvort við komumst í úrlitakeppnina heldur hvar við viljum vera því liðið er staðráðið í að planta sér í keppni þeirra bestu.
Haukarnir eru í dauðafæri með að endurheimta 5. sæti deildarinnar með sigri í kvöld og er mannskapurinn vel stemmdur og vonandi mæta allir með toppstykkið rétt skrúfað á.
Það hefur ekki farið fram hjá neinum að stemmingin í síðustu leikjum hefur dvínað með hverjum tapleiknum og hefur það smitast að hluta yfir í stuðningsmenn. Það er því rosalega mikilvægt að liðið kveiki í stuðningsmönnum og að sama skapi geta stuðningsmenn kveikt í leikmönnum með hávaða og látum.
Vonandi sjáum við sem flesta í pöllunum í kvöld, öskrandi, gargandi og klappandi, og virki sem sjötti maðurinn inn á vellinum með strákunum.