Handknattleiksdeild Hauka hefur gert samning við Söru Sif Helgadóttur um að hún leiki með Haukum næstu tvö árin. Sara Sif er 24 ára markvörður sem er uppalin í Fjölni en hefur leikið með Val síðustu þrjú tímabil og þar á undan var hún leikmaður Fram í þrjú tímabil en tvö af þeim lék hún með HK á láni.Sara Sif hefur verið einn besti markmaður Olís deildar kvenna síðustu tímabil en á liðnu tímabili var Sara Sif í öðru sæti yfir bestu hlutfallsmarkvörslu deildarinnar með 38,8% markvörslu. Þá hefur Sara Sif verið í kringum íslenska landsliðið undanfarin ár og lék hún 2 leiki í febrúar og mars með liðinu gegn Svíþjóð þar sem Sara Sif var með rúmlega 30% markvörslu í fyrri leiknum á Ásvöllum.
Um komu Söru Sifjar hafði Díana þjálfari þetta að segja:„Það er mikilvægt að fá góðan markmann í okkar teymi. Haukar vilja taka næsta skref og þetta er liður í því að stækka og breikka hópinn okkar til að vera samkeppnishæf á öllum vígstöðum. Sara Sif mun passa vel inn í okkar hóp enda með mikinn metnað og því gaman að fá svona leikmann til okkar.“
Það er mikið gleðiefni að Sara Sif velji það að koma í Hauka og mun hún styrkja markvarðateymi og hóp liðsins til muna og hjálpa Haukaliðinu að keppa um alla þá titla sem í boði eru næstu tímabil. Það er því mikil tilhlökkun að sjá Söru Sif í Haukabúningnum eftir sumarið.
Velkomin á Ásvelli Sara Sif!